Ditët e fundit rajoni është përfshirë nga temperatura të larta. Ndërkohë, javën e ardhshme pritet qe temperaturat të rriten edhe më tepër, duke shkuar deri në 40 gradë celsius.
Meteorologët italianë parashikojnë ardhjen e të nxehtit afrikan që këtë fundjavë dhe që do të zgjasë për gjatë gjithë javës së ardhshme si pasojë e ajrit të nxehtë nga anticikloni afrikan që do të fillojë të ngrohë klimën në shumë rajone.
Kulmi i të nxehtit, sipas tyre, parashikohet për javën e ardhshme. Por, ekspertët nuk përjashtojnë edhe stuhi të shkurtra e të rrëmbyera, vecanërisht në zonat me lartësi të madhe mbi nivelin e detit.
Vala e të nxehtit në fakt ka përfshirë Evropën që gjatë kësaj jave, me temperaturat që arriti 47 gradët celcius në Sevilje të Spanjës por edhe në zona të tjera. Franca, Belgjika, Britania e madhe po ashtu shënuan temperatura të larta dhe njerëzit, të çliruar tashmë edhe nga izolimi, iu drejtuan parqeve dhe brigjeve të detit e liqeneve, në kërkim të freskisë.
Nga e hëna ndërkohë, pritet një rritje e madhe temperaturash edhe në rajonin e Mesdheut, përfshirë vendin tonë, dhe ajri i nxehtë që vjen nga Afrika do të bëjë që temperaturat të arrijnë deri 40 gradët celcius në shumë zona./ Opinion.al
