Autostrada Laç-Milot është një nga akset ku drejtuesit e automjeteve nuk respektojnë sinjalistikën rrugore.
Gjatë orëve të fundit policia ka kapur shoferë që lëviznin me shpejtësi nga 203 km/h deri në 230 km/h në këtë aks.
Gjatë 38 orëve të fundit, me shpejtësi tej normave të lejuara deri në 167 km/orë, drejtuesit e automjeteve janë kapur edhe në Rrugën e Kombit.
Gjatë kontolleve të policisë rezulton që në rrugën interurbane kryesore Çermë-Lushnjë, disa drejtues automjetesh kanë lëvizur me 137 km/h deri në 141 km/h.
Për shkak të shpejtësisë së lartë, policia ka pezulluar lejet e drejtimit të automjeteve për 123 shoferë me afat nga 3 deri në 12 muaj.
Policia bën me dije se për shkak të sezonit turistik ka shtuar kontrollet në akest kryesore të vendit. Uniformat blu kanë përdorur radarë automatikë, makina inteligjente, Poliscan dhe dronë edukues, me qëllim parandalimin e aksidenteve rrugore.
Në 48 orë në total janë pezulluar 155 leje drejtimi për shkelje të ndryshme të kodit rrugor, si dhe janë vendosur 2125 masa administrative për shkelje që janë rrezik potencial për përfshirje në ngjarje rrugore.
Shkeljet kryesore që ka konstatura policia gjatë kontrolleve të dy ditëve janë parakalimet e gabuara dhe të rrezikshme, shpejtësi mbi normat e lejuara, drejtues automjetesh që përdorin aparatin celular gjatë drejtimit të automjeteve dhe që nuk vendosin rripin e sigurimit./tvklan
