Në fjalimin e tij të përnatshëm, presidenti ukrainas Volodymyr Zelensky paralajmëroi Rusinë se çdo përpjekje për aneksim do të çonte në sanksione që do ta varfërojnë njësoj si në vitin 1917.
“Dua të theksoj se nuk do të ketë asnjë republikë popullore të Kherson. Nëse dikush kërkon një aneksim të ri, mund të sjellë vetëm sanksione më të ashpra për Rusinë aq sa ta kthenin në varfërinë e pas luftës civilë të 1917. Kështu që është më mirë të kërkojmë paqen”, tha Zelensky.
Ai u bëri thirrje banorëve të rajoneve jugore të Kherson dhe Zaporizhzhia që të jenë shumë të kujdesshëm në lidhje me informacionin që u japin trupave ruse.
“Nëse ju kërkojnë të plotësoni disa pyetësorë, lini të dhënat e pasaportës tuaj diku, duhet ta dini – kjo nuk është për t’ju ndihmuar … Kjo ka për qëllim të falsifikojë të ashtuquajturin referendum për tokën tuaj”, tha ai.
Po ashtu presidenti Zelensky deklaroi se Rusia ka refuzuar vendosjen e një armëpushimi me rastin e Pashkës ortodokse.
Presidenti ukrainas falënderoi SHBA-në për mbështetjen shtesë, duke thënë: “Shtetet e Bashkuara kanë shpallur një paketë të re mbështetjeje për shtetin tonë. Ne jemi mirënjohës për këtë. Kjo paketë përmban mjete shumë të fuqishme mbrojtëse për ushtrinë tonë. Në veçanti, është artileri, predha, drone. Kjo është ajo që ne prisnim.”
Më herët të enjten, Zelensky iu drejtua Parlamentit të Portugalisë dhe tha që nga e enjtja, forcat ruse kanë vrarë të paktën 1,126 ukrainas vetëm në rajonin e Kievit, nga të cilët 40 janë fëmijë. Ai tha gjithashtu se forcat ruse kanë “deportuar” të paktën 500,000 ukrainas nga territori që ata kanë pushtuar.
