Dy javë më parë ishte arenë luftimesh të ashpra, mes forcave të Asadit dhe rebelëve ekstremistë. U sulmua edhe me armë kimike që i morën jetën 75 civilëve. Por tashmë gjithçka ka marrë fund. Duma është sërish në duart e regjimit sirian.
Për të marrë rolin e çlirimtarit, regjimi i Asadit nisi menjëherë rindërtimin e rrugëve të shkatërruara në betejat e për shtypjen e militantëve kundërshtarë me ndihmën e rusëve. Edhe ata kanë marrë rolin e shpëtimtarit. Kanë nisur shpërndarjen e ndihmave për banorët e varfëruar në ekstrem nga militantët ekstremistë, por edhe rrethimi tej zgjatur i ushtrisë siriane.
Aleatët rusë të Asadit lejuan që inspektorët ndërkombëtarë të hetojnë në terren sulmin me armë kimike të 7 Prillit, për të cilin regjimi sirian u përball edhe me sulme ushtarake perëndimore.
Megjithatë zyrtarët amerikanë e konsiderojnë tashmë të pavlerë hetimin në terren, pasi refuzimi i tej zgjatur i Moskës i ka dhënë kohë regjimit të Asadit të zhdukë gjurmët që e inkriminojnë për vrasjen e 75 civilëve me armë kimike, rreptësisht të ndaluara nga konventat ndërkombëtare.
Tv Klan
