Presidenti serb Aleksandër Vuçiç ka udhëtuar në mënyrë surprizë drejt Ukrainës, ndërsa pritet të marrë pjesë në samitin “Ukrainë-Europa Juglindore”.
Vuçiç shkel tokën ukrainase për herë të parë që prej shpërthimit të luftës.
Në një deklaratë, zyra e Vuçiç tha se ai shkon në Ukrainë për të marrë pjesë në Samitin e Odesës. Politikanë të lartë nga 12 vende të Evropës Juglindore pritet të jenë pjesëmarrës në samit.
Edhe pse Beogradi ka refuzuar t’u bashkohet sanksioneve perëndimore ndaj Rusisë për shkak të pushtimit të Ukrainës, ai ka dënuar politikat e Moskës në Kombet e Bashkuara dhe ka shprehur mbështetje për integritetin territorial të Ukrainës.
Vuçiç është takuar më parë edhe me presidentin ukrainas Volodymyr Zelenskiy të paktën tre herë. Beogradi e njeh Ukrainën në tërësinë e saj, duke përfshirë territoret e marra nga Rusia që nga viti 2014.
