Prokuroria e Posaçme, SPAK ka ankimuar në Gjykatën e Apelit vendimin që çoi në gjykim dosjen me të pandehur ish-Prokurorin e Përgjithshëm, Adriatik Llalla.
Kundështimi nuk është për dërgimin e dosjes në gjyq, por vetëm për pikën e vendimit mbi një prej shpenzimeve të hetuara të ish-kryeprokurorit, raporton A2 CNN.
Bëhet fjalë për mosdeklarimin e saktë, nga Llalla të shpenzimeve për shkollimin e një prej fëmijëve, për të cilën ai ka marrë gjobë nga ILDKP. E për këtë çështje gjykata ka vlerësuar se i pandehuri Llalla nuk mund të procedohej penalisht për aq kohë sa ishte gjobitur. Duket se kundërshtimi ka ardhur nga prokurorët e SPAK, që i janë drejtuar Apelit të Posaçëm për të kundërshtuar qëndrimin e gjyqtares paraprake.
Gjykata e Posaçme e Shkallës së Parë ka pranuar kërkesën e SPAK për dërgimin në gjyq të ish-kryeprokurorit në 19 nëntor. Llalla është i akuzuar për “fshehje dhe mosdeklarim të pasurisë”, kryer në tre raste, vepër për të cilën Kodi Penal parashikon dënim nga gjobë, deri në 3 vite burg.
Llalla dyshohet të mos ketë deklaruar një shumë prej 7400 dollarësh të shpenzuara në SHBA, shumën për ndërtimin e një banese dhe shpenzime të kryera në Gjermani, sipas Prokurorisë.
Ndërkaq pak ditë më parë ish-Prokurorin e Përgjithshëm, Adriatik Llalla iu bë dhe sekuestrimi i pasurive të paluajtshme./Opinion.al
