Kreu i PD-së, Sali Berisha ka reaguar në një deklaratë për mediat në lidhje me protestën e zhvilluar nga opozita ditën e djeshme.
Ai u shpreh se këto ishin 180 minuta çlirimi për shqiptarët dhe jo izolimi siç dukej në plan të parë.
“Kryefjala e çdo shqiptari, lajmet e agjencive botërore, ishin një dhe vetëm një, paralizimi prej 3 orësh i Shqipërisë nga veriu në jug. Për këtë më duhet të bëj një korrigjim: Në pamje të parë dukej se Shqipëria ishte e paralizuar për 3 orë, por mbrëmë Shqipëria ishte e çliruar për 3 orë.
Dje Shqipëria rifitoi dinjitetin për 3 orë, por më e rëndësishmja, mesazhi i shpresës që ne u përcollëm qytetarëve, opozita nuk ka frikë nga narkoshteti”, tha Berisha.
