Një ditë pasi kryeministri Rama shpalli vendimin se mbajtja e maskave mbrojtëse do të bëhet e detyrushme në çdo ambjent, ka ardhur edhe reagimi i nënkryetarit të Lëvizjes Socialiste për Integrim, Luan Rama.
Ai e quan masën e re “dyfytyrësi prej maskarai” dhe ka sjellë momente nga fjala e kryeministrit në Kuvend disa muaj më parë.
Në videon e postuar nga Luan Rama, kryeministri i drejtohet nga Kuvendi qytetarëve duke iu thënë të mos blejnë maska se ato nuk mbrojnë nga infektimi me COVID-19.
“… mos rendni për të blerë maska, mos harxhoni lekë për maska, maskat nuk mbrojnë…E gjithë histeria për të blerë maska dhe për t’u maskuar dhe që ka përfshirë gjithë botën, është thjeshtë dhe vetëm harxhim i kotë i parave dhe mbushje e arkave për ata që prodhojnë dhe shesin maska”, dëgjohet të thotë kryeministri Rama.
Duke marrë shkas nga vendimi i djeshëm, numri dy i LSI pyet nëse kjo është “dyfytyrësi prej maskarai e një maskarade me maska, apo vendim për mbushjen e arkave për ata që prodhojnë dhe shesin maska?!”. /Opinion.al
