Ish-ministri i Brendshëm, Saimir Tahiri, u dënua të premten me 3 vjet e 4 muaj burgim. Në mbrëmje Tahiri u dërgua në ambientet e paraburgimit 313 për t’u sistemuar në një nga qelitë e godinave të këtij burgu. Megjithatë, ende nuk ka një vendim nga Drejtoria e Përgjithshme e Burgjeve se në cilin burg do ta vuajë dënimin Tahiri.
Për çështje proceduriale, Saimir Tahiri, u dërgua në Drejtorinë e Policisë së Tiranës ku iu morën sendet personale. Sipas Klan news, Tahiri ka marrë me vete në ambientet e paraburgimit vetëm cigare dhe rroba për t’u ndërruar.
Pas vendimit të djeshëm pritet që mbrojtja do t’i drejtohet Gjykatës së Lartë për rekurs. Gazetarja Glidona Daci shpjegoi se çfarë procedurë pritet që të ndiqet.
“Në fakt duhet theksuar që në momentin që bëhet rekursi, Do mbetet për tu parë nëse treshja e gjyqtarëve do ta zbardhë vendimin që sot dhe menjëherë sapo të njihen me vendimin e arsyetuar, avokatët mbrojtës kanë 5 ditë afat, për t’iu drejtuar me rekurs Gjykatës së Lartë. Do mbetet për t’u parë edhe nga ana e SPAK, e cila kërkonte që Saimir Tahiri të dënohej me 12 vite burg për shkak të gjykimit të shkurtuar me 8 vite, do t’i drejtohet ose jo gjykatës së Lartë. Më pas kjo Gjykatë do të gjykojë rekursin në dhomë këshillimi dhe do të marrë një vendim. Në rast se vendos që çështja të kalojë për gjykim atëherë do të vendosim caktimin e një date dhe të gjitha aktet e dosjes do të rikthehen për të dytën herë në gjykatën e Lartë dhe më pas do të kemi dhe vazhdimin dhe të paktën është një afat 6 ose 7 mujor që mund të zgjasë e gjithë procedura, por mund të shkojë edhe më tepër pasi Gjykata e Lartë ka një sërë çështjesh voluminoze për t’u shqyrtuar. Por fillimisht do të merret vendimi në dhomën e Këshillimit nëse çështja kalon ose jo në seancë gjyqësore”, tha Daci.
Ish-ministri i Brendshëm u vu nën hetim Nëntorin e vitit 2017, pasi autoritetet italiane goditën organizatën e vëllezërve Habilaj. Në përgjimet e kryera, emri i Tahirit përmendej disa herë në bisedat mes trafikantëve.
Prokuroria kërkoi me urgjencë arrestimin e tij, por nuk kishte prova të mjaftueshme. Në Mars organi i akuzës zhvilloi seancën përballë Komisionit të Mandateve ku kërkoi heqjen e imunitetit dhe arrestimin e Saimir Tahirit.
Në Maj të vitit 2018, Tahiri dha dorëheqjen nga mandati i deputetit. Menjëherë më pas prokuroria kërkoi sërish arrestimin e tij. Tahiri kaloi një periudhë të shkurtër në arrest shtëpie, derisa më pas Gjykata e Apelit lejoi hetimin e tij në gjendje të lirë, hetim i cili u mbyll në vitin 2019.
Vendimi u ankimua dhe Gjykata e Apelit në Qershor të vitit 2020, e riktheu për rishqyrtim në Shkallë të Parë. Ankimimi i këtij vendimi në Gjykatën e Lartë, pasoi vitin e kaluar, me prishjen e vendimit për shkak të “shkeljeve procedurale” gjatë procesit, dhe rikthimin e çështjes sërish në Apel me një tjetër trupë gjykuese, e cila u shpreh të premten.
