Një 20-vjeçar është marrë peng nga 2 persona në Tiranë, të cilët e kanë kërcënuar që t’u japë një shumë parash.
Uniformat blu bëjnë me dije se ngjarja ka ndodhur ditën e djeshme në ambientet e një biznesi.
Nga informacionet zyrtare mësohet se 2 shtetas morën peng 20-vjeçarin K. L. duke e kërcënuar se do e vrisnin nëse nuk do u jepte paratë.
“I hoqën lirinë një shtetasi dhe e kanosën atë, për t’u dhënë një shumë parash, identifikohen dhe vihen në pranga 2 autorët e dyshuar, Adrian Mehmeti dhe Aqif Dervishi.
Shërbimet e Komisariatit të Policisë Nr. 4, menjëherë pas njoftimit se një shtetasi i kishin hequr lirinë për disa orë, 2 shtetas të tjerë, kanë organizuar punën për identifikimin dhe kapjen e autorëve dhe vënien e tyre përpara përgjegjësisë ligjore.
Si rezultat i reagimit të menjëhershëm të shërbimeve të Policisë, u identifikuan dhe u vunë në pranga 2 autorët e dyshuar, Adrian Mehmeti dhe Aqif Dervishi, të dy banues në Tiranë.
Nga veprimet hetimore dyshohet se këta shtetas, në bashkëpunim me njëri-tjetrin, ditën e djeshme, në ambientet e një biznesi, i kanë hequr lirinë për disa orë, 20 vjeçarit Klejdi Lila, dhe e kanë kanosur që t’u jepte atyre, një shumë parash”, tha policia.
Materialet procedurale i kaluan Prokurorisë, për veprime të mëtejshme./Opinion.al
