Kryetarja e LSI-së Monika Kryemadhi ka folur në protestën e opozitës përballë Parlamentit. Kryemadhi ka thënë se nuk ka kthim pas dhe se qëllimi i djegies së mandateve është shkëputja e shtetit nga krimi.
“Djegia e mandateve tona nuk ka të bëjë me pozicionet politike, ka të bëjë me fundin e tranzicionit që po kalon Shqipëria. Ne do të ndërtojmë shtetin, institucionet. Ne japim fjalën se nuk ka më kthim pas, sepse do të na mallkojnë fëmijët tanë”, ka thënë ndër të tjera Kryemadhi.
Fjala e Monika Kryemadhit:
Zoti shpëtoftë Shqipërinë. Zoti i rujt shqiptarët kudo që janë. Rama ik, Rama ik, Rama ik! Të dashur motra dhe vëllezër, të dashur vëllezërit tanë policë, që sot i kanë vendosur para prindërve, motrave, vëllezërve të tyre, ata polic që rrogat e tyre janë 300 mijë lekë të vjetra sa kushton një kollare e Edi Ramës, nuk mund të jenë përballuesit e dhunës. Ata policë që janë njëlloj si të gjithë shqiptarët, që vuajnë, që paguajnë faturën e energjisë elektrike njëlloj si ju, më shtrenjtë se çdo herë tjetër. Ata policë paguajnë njëlloj si ju ujin, librat e shkollës së fëmijëve, kanë hedhur letrat e legalizimeve dhe Edi Rama përdor uniformën për t’i shfrytëzuar. Mandatet tona janë për ata policë që duan Shqipërinë. Mandatet tona nuk janë më mandate të narkoshtetit. Nuk janë më fasadë e narkoshtetit. Sot mandatet tona janë mandate të shqiptarëve, janë mandate për t’u rikthyer në 1990 për të thirrur së bashku “liri, demokraci”. Sot janë mandatet e unazës së re, janë mandatet e minatorëve, të naftëtarëve, janë mandatet e atyre studentëve që në mënyrën më të bukur i nxorrën bojën shtetit të kalbur të Edi Ramës. Nëse në çdo vend demokratik, nëse një kryeministër, apo deputet, do të faktoheshe nga prokuroria se votat e tyre janë blerë me paratë e drogës, të jeni të bindur se jo vetëm do të ishin në burg, por do kishin djegur çdo cep institucioneve të narkoshtetit. Djegia e mandateve tona nuk ka të bëjë me pozicionet politike, ka të bëjë me fundin e tranzicionit që po kalon Shqipëria. Ne do të ndërtojmë shtetin, institucionet. Ne japim fjalën se nuk ka më kthim pas, sepse do të na mallkojnë fëmijët tanë. Do na mallkojë shprti i qindra mijërave shqiptarë. Rama ka ikur, po të ishte i fortë do të ishte në atë sallë. Po të ishte i fortë nuk do ikte si Arafati, që çdo ditë nuk rri në asnjë vend. Prandaj ju bëj thirrje, që ky kryeministër nuk mund të mbajë në dorë të ardhmen e shqiptarëve. Secili nga ne ka një mision dhe misioni është shumë i qartë: Të largojmë krimin, të ndajmë politikën nga krimi dhe droga dhe t’i kthejmë lirinë shqiptarëve, t’i kthejmë identitetin vendit tonë./Opinion.al
