Në mbledhjen e sotme të Grupit Parlamentar të PD, kreu i Partisë Demokratike Sali Berisha, është ndalur edhe te situata në Kosovë, ku serbët janë larguar nga institucionet.
Teksa iu shprehu solidaritetin e tij qytetarëve të Kosovës, Berisha akuzoi Presidentin rus Vladimir Putin dhe atë serb Aleksandër Vuçiç për ndërhyrje në punët e brendshme në Kosovë.
Sipas Berishës, e gjitha kjo që ndodh është përpjekje e Vuçiç për të mbajtur shtetin serb në Kosovë.
“Ky është një moment jo i lehtë për Kosovën ndaj dhe unë dua t’i shpreh solidaritetin tim qytetarëve të Kosovës dhe të dënoj me forcën më të madhe ndërhyrjen e Kremlinit dhe Beogradit në punët e brendshme të Kosovës. E gjitha kjo që ndodh është përpjekje e Vuçiç për të mbajtur shtetin serb në Kosovë. Ai nuk e fsheh këtë.
Përshëndes me këtë rast qëndrimin e vendosur të NATO në mbrojtje të stabilitetit të Kosovës. Sepse Putin dhe Putinin e vogël Vuçiç janë të gatshëm të ndërmarirn një aventurë të re, Serbia e mban konfliktin të varur në gozhdë për ta ndërmarrë kur të gjykojë ajo. Por paralajmërimet ultimative të NATO-s, uroj që mos imagjinojë asnjë lloj përpjekje për destabilizim në Kosovë pasi ndëshkimi do jetë shumë i rëndë”, deklaroi Sali Berisha.
