Luka Modriç sheh menjëherë nga e ardhmja. Menjëherë pas humbjes me Paris Seint Zhermen, që ishte edhe ndeshja e tij e fundit me Realin, ylli kroat bëhet gati të nisë aventurën me Milanin.
Pas vizitës blic të Igli Tare, fantazisti firmosi kontratën që e lidh me kuqezinjtë për një vit, deri në qershor të 2026-ës. Ai do të përfitojë 3,5 milionë euro rrogë, ndërsa tani pritet vetëm zyrtarizimi i marrëveshjes.
40 vjeçari do të ketë në dispozicion disa javë pushim dhe do të paraqitet në Milanelo për vizitat mjekësore dhe prezantimin me shokët e rinj të ekipit në fundin e korrikut ose në fillim të gushtit. Megjithë moshën e madhe, Modriç do ti sjellë klas dhe eksperiencë mesfushës së Milanit.
Figura e fituesit të Topit të Artë në vitin 2018 do të ketë peshë në ekip, me trajnerin Alegri që shpreson se ai do të injektojë te lojtarët e tjerë mentalitetin e fituesit.
Ndërkohë, Tare vijon negociatat edhe për Ardon Jasharin, ku po ndeshet me rezistencën e Club Brugge. Drejtuesit e klubit belg deklaruan se mesfushori do të qëndrojë, nëse nuk vjen një ofertë e përshtatshme. Kjo bën që Milani të rrisë ofertën prej 33 milionë euro, plus 5 bonus për talentin shqiptar.
