Një mjek amerikan po u bën thirrje njerëzve që të ndalojnë marrjen e ilaçit Ivermectin për të trajtuar COVID-19.
Pacientët kanë pasur nevojë për trajtim urgjent në njësitë e urgjencës në spitalet e Oklahoma pas marrjes së ilaçit, thotë Dr Jason McElyea.
Doza të vogla të Ivermectin janë miratuar për përdorim te njerëzit, por jo për trajtimin e sëmundjes COVID-19.
“Ju duhet të keni një recetë mjekësore për përdorimin e këtij ilaçi – sepse mund të jetë e rrezikshme,” tha Dr McElyea për BBC.
Ilaçi është bërë i diskutueshëm pasi u promovua si një mënyrë për të trajtuar ose parandaluar COVID, pavarësisht se deri më tani nuk është aprovuar nga autoritetet shëndetësore.
Përdorimi i tij është bërë aq i zakonshëm në SHBA saqë Administrata e Ushqimit dhe Barnave (FDA) lëshoi një deklaratë muajin e kaluar duke u bërë thirrje njerëzve që të mos e marrin atë.
FDA paralajmëroi se marrja e dozave të mëdha të substancës” është e rrezikshme dhe mund të shkaktojë dëm serioz “.
Dr McElyea tha se pacientët që kishin marrë ilaçin po mbërrinin në spital me të vjella, dhimbje të muskujve dhe madje edhe humbje të shikimit.
“Disa njerëz që po marrin doza të papërshtatshme në fakt e kanë vënë veten në kushte më të këqija sesa nëse do të ishin infektuar nga COVID-19,” tha Dr McElyea./Opinion.al
