Kryesore

Mjeku i Danimarkës: Eriksen kishte vdekur, nuk di se si e kthyem në jetë


Bëhu pjesë e Grupit Zyrtar të Opinion.al
>> KËTU <<
               Publikuar në : 18:28 - 13/06/21 |
Opi Nion

“Christian kishte ikur, ai ishte praktikisht i vdekur … Ai ishte në arrest kardiak. Nuk e di se si e kthyem përsëri në jetë, gjithçka ndodhi kaq shpejt. Unë nuk jam kardiolog, nuk mund të hyj në detaje, prandaj ka specialistë, ekspertë të kësaj fushe”. Ishin këto fjalët e Morten Boesen, drejtori mjekësor i skuadrës së Danimarkës, gjatë konferencës për shtyp të organizuar nga Federata pas arrestit kardiak të futbollistit Eriksen në fushë.

“Ne ende nuk kemi një shpjegim pse i ndodhi kjo Eriksen, në këtë moment nuk di si të përgjigjem”, vijoi ai ndërsa pohoi se kanë qenë katër psikologë që kanë asistuar djemtë e ekipit përgjatë gjithë natës në hotel, për shkak të tronditjes së thellë që ata kishin pësuar.

Ndërkohë drejtuesi i Shoqatës Daneze të Futbollit, Peter Moeller, sqaroi vendimin e kthimit në fushë dhe vazhdimin e lojës.

“Skuadra nuk u detyrua për asgjë. Ishte një vendim i vështirë, ne zgjodhëm ta merrnim atë dhe të vazhdonim ndeshjen. Vendimi për të vazhduar u mor nga drejtuesit. Askush nuk mund t’i fajësojë lojtarët, unë nuk ndjeva ndonjë presion nga  Uefa, megjithatë, nuk jam i sigurt se loja ishte gjëja e duhur. Në të ardhmen duhet të shohim, sepse të gjithë e duam futbollin, por sigurisht që nuk është gjëja më e rëndësishme në botë”, u shpreh ai.

Kasper Hjulmand, trajneri i Danimarkës, tha në një konferencë shtypi se vendimi për të vijuar ndeshjen ndoshta nuk qe i duhuri.

“Unë mendoj se ishte gabim që i vendosëm lojtarët tanë përpara mundësisë për të vazhduar lojën ose për të ndaluar përgjithmonë. Ata ishin në kushte stresi të madh, ata nuk ishin në dijeni të gjendjes së shokut të tyre të skuadrës – shton ai -. Unë kam ndjesinë se nuk duhet të kishim luajtur. Por unë mendoj kështu tani. Ishte e vështirë të marrësh një vendim në atë moment. Unë jam krenar për ekipin tim. Dje kemi patur prova se si shpirti i ekipit, solidariteti dhe dashuria janë në bazë të futbollit. Sinjali që vinte nga fusha dhe nga tribunat ishte shumë i fortë”, u shpreh ai.

Federata Daneze e Futbollit në një tuit njoftoi se gjendja e futbollistit është tashmë e qëndrueshme.

“Këtë mëngjes biseduam me Christian Eriksen, ai i dërgoi falënderimet e tij për të gjithë ekipin. Gjendja e tij është e qëndrueshme, ai mbetet në spital për analiza të mëtejshme”, shkroi Federata./Opinion.al

Pas