Një grua që ishte në muajin e 9 të shtatzanisë ka ndërruar jetë në maternitet pasi është sorollatur spital më spital nga ora 22:30 e mbrëmjes së djeshme e deri në orën 05:30 të ditës së sotme. Pas denoncimit të familjarëve për mjekim të pakujdeshëm, kanë nisur edhe hetimet policore në lidhje me këtë rast të rëndë që ndodh në spitalet tona. Bashkë me nënën vdiq në bark edhe fëmija që pritej të lindte. Aida Çajka ka lënë dy fëmijë të mitur, jetimë.
Rreth mesditës së sotme ka reaguar edhe Ministria e Shëndetësisë. Ajo në një deklaratë të hollësisme për mediat, përshkruan gjithë kartelen e pacientes dhe thotë se i është dhënë mjekimi i duhur. Por Ministria e Shëndetësisë nuk arrin të shpjegojë se pse nuk u përcaktua diagnoza në kohë. Siç thuhet në njoftim është konstatuar pas 7 orësh se gruas shtatzënë i kishte plasur shpretka.
Ja deklarata e plotë e MSH:
Pacientja A. Ç., e datëlindjes 28/07/1981, lindur në Kukës dhe banuese në Bathore, Tiranë, shtatzënia e tretë, është paraqitur në SUOGJ “Koço Gliozheni” rreth orës 22:30 minuta të datës 15/09/2016.
Pacientja paraqiti ankesa për vështirësi në frymëmarrje, cianozë periorale dhe dhimbje në regjionin perikardiak.
Në Repartin e Pranimit të Shërbimit të Obstetrikës të këtij spitali, është ekzaminuar nga mjekët e rojës në abdomen, pasi gruaja ka refuzuar vizitën vaginale, e cila rezultoi me RZF (Rrahjet e Zemrës Fetale) prezente, uterus të qetë, pa kontraksione, paraqitje oblikcefalik në palpacion, pa hemorragji të dukshme.
Në këto kushte, pacientja dërgohet me autoambulancë nën asistencë të personelit mjekësor rreth orës 23:15 minuta në Urgjencën e QSUT “Nënë Tereza”, dhe pas mbërritjes është vizituar nga mjeku kardiolog.
Më tej, nisur nga dispnea, cianoza dhe dhimbja prekordiale që paraqiste pacientja, rreth orës 01:45 minuta dërgohet me autoambulancë nën asistencën e personelit mjekësor të shërbimit të Urgjencës në SU “Shefqet Ndroqi”.
Pacientja u paraqit në SU “Shefqet Ndroqi” rreth orës 02:00 të datës 16/09/2016. Aty konstatohet një rënie e kuadrit të gjakut, grafi pulmonare normale dhe u dyshua për hemorragji të brendshme pa burim të përcaktuar.
Për këtë arsye, pacientja rikthehet në SUOGJ “Koço Gliozheni” në orën 04:00 të datës 16/09/2016, e shoqëruar me personel mjekësor me oksigjen dhe në perfuzion me dopaminë, ku shtrohet me diagnozën: “Gravidancë 41-42 javë oblikcefalik, fetomorto in utero, abdomen akut”.
Qysh në shtrim, përshkruhet gjendje e rëndë, e zbehtë, me djersë, puls të dobët takikardik 120/min, TA (Tension Arterial) 83/40 mm të shtyllës së zhivës.
Në këto kushte, transferohet menjëherë në reanimacion, ku fillohet reanimimi dhe monitorimi.
Vazhdoi trajtimi i pacientes me gjak, dopaminë, adrenalinë dhe O2 nazal dhe kortizonik.
Në kushtet e gjendjes së rënduar të pacientes, u thirr konsultë e zgjeruar, dhe me gjithë vazhdimin e reanimimit, gjendja e pacientes vazhdoi të rëndohet, me puls periferik, me shenjat tipike të gjendjes së shock-ut.
Në këtë situatë, konsulta vendosi që pacientja të futet në sallën operatore me diagnozën: “Abdomen Akut”, me dyshim për hemorragji të brendshme.
Në orën 05:00 pacientja e fut në sallën operatore, ku u hap barku dhe u konstatua hemoperitoneum, rreth 2 500 ml, me koagula të shumta, kryesisht majtas, uterusi (mitra) intakt (e paprekur).
U nxor fetusi i vdekur (vdekje e freskët), likid i pastër, placentë normale.
Nisur nga reperti kirurgjikal i paraqitur në orën 05: 45 minuta u kërkua konsultë nga kirurgu, i cili konstatoi hemorragji masive në regjionin e shpretkës dhe koagula të shumta në këtë zonë.
Me gjithë ndihmën mjekësore të ofruar, pacientja fatkeqësisht ndërroi jetë.
Kështu, të gjitha lëvizjet e pacientes janë bërë me autoambulancë nën asistencën e personelit mjekësor dhe shoqëruar me dokumentacionin mjekësor përkatës.
Autoambulanca SUGJ “Koço Gliozheni”– QSUT: TR 3516 L Autoambulanca QSUT– SU “Shefqet Ndroqi”: TR 9438 K Autoambulanca SU “Shefqet Ndroqi” – SUGJ “Koço Gliozheni”: TR 9604 K.
