Pas disa incidenteve rradhazi, mjekët e QSUT-së po protestojnë kundër dhunës ndaj tyre. Bluzat e bardha shprehin shqetësim për sigurinë e tyre, teksa pohojnë se janë vazhdimisht nën presion gjatë ushtrimit të detyrës.
Kjo protestë u nxit nga një incident i ndodhur më 7 mars në QSUT, teksa u dhunua mjekja specializante e Kirurgjisë V.Z.
“Doktoresha ka qenë në shërbim dhe në orarin e punës dhe duke komunikuar vendimin e qeverisë se ditën e mërkurë të gjithë pacientët e të gjitha urgjencave do të kalojnë në spital “Shefqet Ndroqi”. Është një vendim i shpallur para disa kohësh nga qeveria të cilët ne jemi të detyruar ta zbatojmë. Kjo mjaftoi që kolegia jonë të vihet përpara situate dhune përpara pacientit dhe familjarëve të pacientit që e shoqërojnë. Kjo është e patolerueshme dhe e papranueshme, punojmë nën presion.” tha njëra prej mjekeve specializante në protestë.
Ndërkohë kujtojmë se ky nuk është një rast i izoluar, por i përsëritur, pasi në qytetin e Lezhës u dhunua mjeku Zef Doda, i cili u qëllua në fytyrë nga një 24-vjeçar, duke i shkaktuar thyerje të kockave të fytyrës, ndërsa pranë Spitalit të Durrësit një mjek i urgjencës mbeti i lënduar, pasi u godit me mjete rrethanore./ Opinion.al
