Kryeministri Edi Rama nga qyteti i Burrelit, pak minuta më parë, përgjatë takimit elektoral me qytetarët nuk i ka shpëtuar një gafe.
Në kohën që po kritikonte Partinë Demokratike se nuk ka gra dhe vajza në listat e radhës, përpara elektoratit, ai tha se lista e Partisë Socialiste është 50% gra dhe 50% vajza.
Kryeministri iu drejtua po ashtu grave dhe vajzave të Burrelit me një pyetje thumbuese të cilen e përsëriti dy herë: si iu duket puna në bashki tani që hoqët një grua dhe votuat një burrë?.
“PD e cila kërkon votën në emër të një Republike të re, ka paguar gjobë për mungesë grashë dhe vajzash në listat e shumë qarqeve. Sipas PD nuk paska gra dhe vajza të denja për të përfaqësuar Beratin, Lezhën, Fierin, vetëm burra. Ne i kemi listat 50% gra dhe 50% vajza, ndaj unë i ftoj gratë dhe vajzat të votojnë për Partinë Socialiste. Pasi iku një grua nga bashkia dhe erdhi një burrë si ju duket puna? Unë i them grave dhe vajzave si po ju duket tani puna?” tha Rama nga Burreli.
