Edhe pak orë kanë mbetur për shpalljen zyrtare të listës se Demokracisë së Re në Greqi, me kandidatët për eurodeputetë.
Mediat greke shkruajnë se në listë janë konfirmuar shumica e kandidatëve, ndërsa në fund të listës do të jetë dhe ai i Fredi Belerit, kryetarit të zgjedhur të Himarës, i cili ndodhet në burg prej 12 majit të vitit 2023 për blerje votash.
Zgjedhja e Belerit është një bast personal i kryetarit të partisë në pushtet, Kyriakos Mitsotakis, pasi ai dëshiron të dërgojë një mesazh të qartë dhe në të njëjtën kohë të rrisë vrullin e votimit.
Gjithashtu, absolutisht e sigurt duhet konsideruar edhe kandidatura e Eleonora Meletit.
Më 22 mars, Demokracia e Re shpalli 28 emrat e parë në fletëvotim.
Ndër emrat kryesorë që u shpallën janë Eliza Vozeberg, Pyrros Dimas, Noni Dounia, Thanasis Exadaktylos, Vassilis Kontozamanis, Vangelis Meimarakis, Dimitris Tsiodras, Voula Patoulidou dhe Evi Christofilopoulou.
Mesazhi i dërguar nga Qeveria greke është se zgjedhjet e qershorit janë udhëkryq dhe këtë duhet ta kuptojnë qytetarët.
