Policia e Las Vegasit ka arrestuar një burrë i cili ka lidhje me vrasjen e reperit Tupac Shakur në vitin 1996.
Legjenda e hip-hopit u qëllua 4 herë dhe vrasësi i tij kishte mbetur një mister.
Sipas mediave të huaja, mësohet se Duane Keith “Keefe D” Davis u arrestua herët në mëngjesin e së premtes dhe mbi të rëndojnë akuza, ende jo publike për vrasjen e Tupac, raporton “AP”, e cila shkruan se ka kontaktuar me dy zyrtarë që kanë informacion të dorës së parë mbi këtë arrestim.
Davis nuk është një emër i ri për vrasjen e reperit sepse ai ka pranuar në intervista dhe në librin e tij, “Compton Street Legend” se ishte brenda Cadillac-ut prej të cilit dolën të shtënat drejt tij.
Keefe D është xhaxhai i Orlando Anderson, i cili është i dyshuar nga publiku si vrasësi i Tupac.
Tupac ishte vetëm 25 vjeç kur ndërroi jetë. Ai vdiq më 13 shtator 1996, një javë pasi u qëllua katër herë në makinën e tij ndërsa priste në semafor të kuq.
Vdekja e reperit, një nga më të vlerësuarit në hip-hop, ka frymëzuar disa dokumentarë.
Tupac shiti më shumë se 75 milionë disqe në mbarë botën, duke shijuar suksesin e top-listave me hite, duke përfshirë California Love, All Eyez On Me dhe Changes./Opinion.al
