Një avion i “British Airways” i destinuar për të shkuar në Dusseldorf të Gjermanisë është ulur në aeroportin e Edinburgut sepse pilotit i ishte dorëzuar plani i gabuar i fluturimit. Pasagjerët e kuptuan se kishin zbritur disa qindra kilometra më larg se destinacioni, kur dëgjuan pilotin të thotë nga kabina “Mirëserdhët në Edinburg!”.
Fluturimi u menaxhua nga kompania gjermane “WDL” për llogari të “British Airways”, e cila nuk e ka kuptuar ende se si ka ndodhur gabimi. “U kemi kërkuar ndjesë klientëve dhe do t’i kontaktojmë të gjithë personalisht”, ka deklaruar kompania britanike.
Më i çuditshëm është fakti se autoriteti i trafikut ajror nuk ka komunikuar asnjëherë me pilotin për t’i thënë se po ndiqte drejtimin e gabuar. Pasagjerët kanë treguar se kur piloti ka thënë se kanë mbërritur në Edinburg, të gjithë kanë menduar se ka qenë shaka.
Avioni ka qëndruar për rreth dy orë në pistë, përpara se të nisej për në Dusseldorf. Kjo gjë ka sjellë irritimin e pasagjerëve, pasi shërbimet higjenike u bllokuan si edhe u mbaruan ushqimet që stjuardesat ofronin për ta.
Në fund, piloti me shumë sportivitet ka pyetur se “kush do të shkojë për në Dusseldorf të ngrejë dorën”. Të gjithë pasagjerët kanë ngritur duart dhe avioni ka nisur udhëtimin për në destinacionin real./Opinion.al
