Republikanët në Shtetet e Bashkuara të Amerikës kaluan me një rezultat të ngushtë në Dhomën e Përfaqësuesve një projektligj për taksat dhe shpenzimet, të cilin Presidenti Donald Trump e ka përshkruar si “të madh e të bukur”.
Siç shkruajnë mediat amerikane, ky vendim mund të pasojë me ndryshime të mëdha në Medicaid, programet e ndihmës ushqimore, sigurinë e kufijve dhe taksat. Po ashtu do të shihte në zbatim një nga premtimet kryesore të Trump gjatë fushatës zgjedhore pasi eliminon disa taksa mbi bakshishet e punëtorëve dhe orët shtesë. Po ashtu, pritet që ky ligj të jetë më i rëndësishmi që Trump kalon në mandatin e tij të dytë në Zyrën Ovale.
Projektligji kaloi vetë me një votë më shumë, 215-214. Kundër e votuan edhe dy republikanë, të cilët edhe më herët kanë shprehur pakënaqësinë e tyre me projektligjin dhe mbi të gjitha tregon një “përçarje” mes republikanëve të Trump. Kujtojmë se para një jave, i njëjti projektligj nuk kaloi dot për shkak se pesë ligjvënës nga radhët e tij e votuan kundër.
Mediat shkruajnë se u deshën disa ditë negociata, madje edhe një takim më 21 Maj në Shtëpinë e Bardhë, që republikanët të bënin disa lëshime në mënyrë që paketa ligjore të kalonte.
Por pavarësisht se projektligji “ia hodhi paq” nga Dhoma e Përfaqësuesve, ka edhe një hallkë tjetër që duhet të kalojë e që është Senati.
Pikat kyçe të projektligjit
S’ka taksa mbi bakshishet dhe orët shtesë të punës
Projektligji do të përfshijë disa lehtësime të përkohshme tatimore dhe masa të reja që synojnë kategori të caktuara të popullsisë si për shembull:
Përjashtime të përkohshme nga tatimi për bakshishet dhe orët shtesë të punës, që synojnë të lehtësojnë punëtorët me të ardhura më të ulëta. Zbritje e re tatimore për interesin e kredive të makinave të prodhuara në SHBA, me qëllim nxitjen e industrisë vendase të automobilave.
Zbritje e re tatimore për qytetarët mbi 65 vjeç, që do të ndihmojë pensionistët me të ardhura të moderuara. Krijimi i një llogarie kursimi “Trump” për fëmijët nën 8 vjeç, e cila do të financohet me 1,000 dollarë nga qeveria federale.
7.6 milionë amerikanë mund të humbin Medicaid
Medicaid, programi për sigurimin shëndetësor të më shumë se 71 milionë amerikanëve me të ardhura të ulëta, do të pësonte ndryshime të mëdha.
Me pak fjalë, propozimi për Medicaid mund të shpëtojë 625 miliard Dollarë, por nga ana tjetër të shkaktojë humbjen e sigurimit shëndetësor për 7.6 milionë amerikanë. Propozimi jep ndryshime edhe në programet e ndihmës ushqimore, të cilat asistojnë rreth 42 milionë amerikanë.
Më shumë shpenzime për sigurinë e kufijve
Projektligji i jep më shumë se 140 miliard dollarë Donald Trump-it në luftën e tij kundër emigracionit të paligjshëm. Aty përfshihen 50 miliardë Dollarë për një mur kufitar, 45 miliardë për ndërtimin e disa qendrave për emigrantët, 8 miliardë Dollarë për zyrtarët e emigracionit dhe 14 miliardë të tjera për dëbimet. Jep gjithashtu 150 miliardë dollarë për shpenzimet për mbrojtjen, duke përfshirë 20 miliardë për “Kupolën e Artë”, një sistem për mbrojtjen ajrore./tvklan.al
