Kuvendi ka miratuar me 96 vota pro ndryshimet në Kodin Penal, ndërsa 11 deputetë votuan kundër dhe 2 abstenuan. Kryetari i grupit parlamentar të Partisë Socialiste Taulant Balla u shpreh më herët se parashikimet e deritanishme të kodit kanë rezultuar se nuk garantojnë sipas standardeve të vendeve të BE-së veprimet e dhunës.
“Kemi propozuar ashpërsimi e dënimeve për veprat e dhunës ndaj policit, mjekut, sportistit, arbitrit, dhe trajnerit, funksionareve publike dhe të zgjedhurve, apo atyre që shërbejnë në shërbimin publik si dhe përfshirja e veprave të reja penale për adresimin e duhur të çështjeve të dhunës si akte që ngarkojnë me përgjegjësi penale” tha ndër të tjera Balla.
Në seancën e sotme është miratuar edhe projektligji për Mbrojtjen Civile me 90 vota pro ndërsa 8 deputetë votuan kundër.
Ministrja e Mbrojtjes Olta Xhaçka u shpreh se, përmes këtij projektligjit i jepet transformim qasjes ndaj fatkeqësive natyrore, planifikim afatgjatë dhe marrje e masave në kohë.
Gjithashtu u miratuan edhe dy ligjet e reformës në drejtësi pas një marrëveshjeje mes mazhorancës dhe opozitës në parlament. Me 106 vota pro dhe 1 abstenim u miratuan projektligji për organet e qeverisjes në sistemin e drejtësisë projektligji për statusin e gjyqtarëve dhe prokurorëve.
Miratimin e Kuvendit morën edhe dy kontratat konçesionare për rrugët Orikum – Llogara dhe Milot – Balldren me shumicë të thjeshtë votash.
Projektligji “Për miratimin e kontratës së koncesionit/PPP, ndërmjet Ministrisë së Infrastrukturës dhe Energjisë, dhe “Gjikuria”, sh.p.k., si konçesionari, dhe shoqërisë konçesionare “Rruga Orikum – Llogara”, sh.p.k. për ndërtimin dhe mirëmbajtjen e rrugës “Porti jahteve – By-Pass Orikum – Dukat (Ura e Shën Elizës)” u miratua me 78 vota pro ndërsa 26 deputetë votuan kundër dhe 4 abstenuan.
Në mënyrë të njejtë u votua edhe për projektligjin “Për miratimin e kontratës së koncesionit/PPP, ndërmjet Ministrisë së Infrastrukturës dhe Energjisë, si autoriteti kontraktor, shoqërisë “ANK”, sh.p.k., si koncesionari, dhe shoqërisë “Bardh konstruksion”, sh.p.k., si shoqëria koncesionare, për projektimin, ndërtimin dhe mirëmbajtjen e segmentit rrugor Milot – Balldren”.
Këto dy projektligje u kundërshtuan nga opozita në parlament edhe gjatë seancës por gjithsesi mazhoranca i kishte votat e nevojshme për ti kaluar. Më herët Partia Demokratike ka denoncuar se vlera konçesionare e ndërtimit të këtyre akseve është më e lartë nga vlera reale dhe se e kjo skemë partneriteti publik privat bëhet me qëllime korruptive. /Opinion.al
