Nëse i gjithë diskutimi i momentit është ndarë mes Murinjos dhe Guardiolës, menaxheri, Mino Raiola është radhitur në anën e portugezit të “djajve” të kuq. Raiola është me Ibrahimoviç, Pogba dhe Mkitarian, ndaj qartësisht ka më shumë arsye për të qenë kundër Guardiolës. Kështu, kur jemi vetëm pak orë përpara nisjes së derbit, menaxheri i famshëm ka sulmuar hapur edhe Pep Guardiolën.
“Nuk ka bo… të ulet në tavolinë me mua. Nuk më pëlqen, edhe pse nuk e urrej. Nuk është trajner i keq, edhe pse bën një futboll shumë të mërzitshëm”, është shprehur menaxheri Raiola në lidhje me trajnerin aktual të Mançester Sitit. Pak ditë më parë, Raiola e kishte me Jurgen Klop, të cilin e ofendoi rëndë (Është një copë m…). Tashmë nga goja e menaxherit dalin fjalë jo fort komode edhe për teknikun që drejton “Qytetarët”.
Presidentët
Gjatë fjalës së tij, Raiola ka diçka për të thënë edhe për presidentin e Real Madridit, Fiorentino Perezin.
“Me të nuk kam një raport të keq. Në të vërtetë, me të kam një raport që realisht s’ekziston fare. Nuk kam asnjë raport. Nuk kam nevojë që ta kem mik, por as armik”, ka deklaruar Raiola në një bisedë telefonike në një emision radiofonik spanjoll.
Baloteli e Zllatan
Duke qenë se janë si dy të kundërta, për nga suksesi që kanë përjetuar në karrierë, ai që i bashkon është edhe talenti dhe… menaxheri.
“Ibrahimoviç është më shumë profesionist sesa Baloteli. Nëse Mario do të kishte pasur mendësinë dhe logjikën e Zllatanit, tashmë do të ishte një ndër më të mirët në botë”, vijon menaxheri.
Donaruma
Nuk mund të mungonte një shpjegim për portierin e Milanit.
“Nëse do të vazhdojë të rritet me të njëjtat ritme, atëherë do të bëhet shumë shpejt numri një në botë. Reali nuk është interesuar për të”, ka përfunduar Raiola.
