Ministrja e Shëndetësisë Ogerta Manastirlliu ka mbrojtur Doktoraturën me një material të vjedhur. Denoncimi është bërë sot nga Lëvizja për Universitetin, ndërsa deri më tani nuk ka një reagim nga znj.Manastirlliu.
Ministrja ka kryer fakultetin e Shkencave të Natyrës në vitet 2000, ndërsa në 2013 ka mbrojtur doktoraturën me temë : “Krahasimi i monitorimeve të mjedisit në landfill-in e Sharrës, para dhe pas ndërhyrjes si dhe ndikimet në mjedis”. Pikërisht ky punim është plagjiaturë thotë Lëvizja për Universitetin.
“Në kapitujt hyrës e ka kopjuar thuajse në çdo gërmë nga puna shkencore e diplomantit për master shkencor nga Republika e Afrikës së Jugut, Fannie Mnisi. Herë pas here në tekst duket se është zëvendësuar emri i lokalitetit Albert Luthuli me emrin e Tiranës, për të dalë në konkluzionet “shkencore” për famëkeqin landfill të Sharrës. Në vend të punës shkencore me dinjitet, mashtrim dhe turp! Ne kërkojmë shkarkimin e menjëhershëm të Ogerta Manastirliut nga posti i Ministres së Shëndetësisë”, shkruhet në faqen në facebook të Lëvizjes për Universitetin.
