Drejtori i Arsimit për qarkun e Lezhës, Bardhok Pulaj reagoi ndaj Ministres së Arsimit të PD-së, Mirela Karabina, e cila e ka çuar për ndjekje penale bashkë me 3 drejtorë të tjerë.
Pulaj thotë se nuk është angazhuar në fushatë elektorale dhe mbetet i çuditur se si nuk ka pasur asnjë komunikim nga MAS, por vetëm ka parë emrin e tij në media. Sipas drejtorit të Arsimit nuk është turp të jesh socialist, ndërsa shton se bindja politike nuk e ka penguar të shërbejë me ndershmëri dhe konform ligjit për 3 vite si kreu i DAR Lezhë.
Statusi i plotë i Bardhok Pulajt në facebook
Nuk kisha menduar kurrë që për punën që bëj me pasion e ndershmeri, vetëm në respekt të ligjit të kallëzohem penalisht nga eproja ime që vetëm njëherë i kam dhënë dorën dhe nuk kam komunikuar kurrë për asgjë për punën time si drejtor i DAR Lezhe apo për angazhimin tim politik. Unë i njoh dhe respektoj mirë ligjet dhe urdhrat e këtij shteti.
Një nga arritjet e mëdha të kësaj qeverie dhe ministres Nikolla është depolitizimi i arsimit dhe kjo është bërë më së miri dhe nga DAR Lezhë qe unë drejtoj prej tre vitesh e gjysmë. Në asnjë rast nuk kam marrë pjesë në asnjë veprimtari politike që nga dalja e urdhrit, megjithëse jam qytetar i lirë i këtij vendi dhe socialist njëkohësisht. Kjo s’më pengon ti shërbej me ndershmëri e profesionalizëm misionit për respekt ndaj mësueseve dhe dijes së nxënësve.
Thjeshte me vjen keq qe emri im doli ne media dhe e mora vesh prej tyre.
Misioni vazhdon. Respekte.
***
Njoftimi i Ministrisë së Arsimit
Ministria e Arsimit dhe Sportit, mbi bazën e informacioneve të mbledhura ka evidentuar raste të pjesëmarrjes të punonjësve në pozicione drejtuese të cilët në kundërshtim me ligjin, janë angazhuar në aktivitete të fushatën zgjedhore në kundërshtim më përcaktimet ligjorë.
Për të gjithë rastet për të cilat ka fakte të dokumentuara, Ministria e Arsimit dhe Sportit ka depozituar pranë organit të Prokurorisë në rrethet përkatëse dhe duke informuar edhe Prokurorinë e Përgjithshme, për drejtuesit, si më poshtë:
Përgjegjësi i Zyrës Arsimore Librazhd, znj. Fatbardha Qatja
Përgjegjësi i Zyrës Arsimore Gramsh, z. Xhevit Dyrmishi
Përgjegjësi i Zyrës Arsimore Bulqizë, znj. Bedrie Manjani
Drejtori i Drejtorisë Arsimore Rajonale Lezhë, z. Bardhok Pula
/Opinion.al
