Ministrja e Jashtme e Kosovës u bëri sot thirrje qeverive perëndimore që të ndërmarrin veprime kundër Serbisë pas tensioneve të fundit të krijuara në Veri të vendit.
Zëvendëskryeministrja dhe ministrja e Jashtme Donika Gërvalla në një deklaratë për The Guardian tha se sulmi ishte agresion i Serbisë ndaj Republikës së Kosovës.
“Tani asgjë nuk mund të mbetet ashtu siç ka qenë. Ajo që ndodhi të dielën, më 24 shtator 2023, ishte një akt i hapur agresioni i Serbisë ndaj Republikës së Kosovës”, tha ajo.
“Kjo është dëshmuar edhe në ditët e fundit”, tha ajo, duke shtuar se “autoritetet e Kosovës po zbulojnë më shumë armë dhe pajisje ushtarake në vende të ndryshme të pjesës veriore të Kosovës, përgjatë kufirit me Serbinë”.
Ajo akuzoi Serbinë se qëndron “pas sulmit terrorist” dhe tha se “ky përshkallëzim është kërcënim jo vetëm për Kosovën, por për gjithë rajonin”.
“Qëllimi i këtij agresioni ishte pushtimi i veriut të Kosovës dhe imponimi i ndarjes, për të cilin qeveritarët e Serbisë kanë punuar vazhdimisht, haptas dhe në fshehtësi, me vite të tëra”, shtoi ajo./Opinion.al
