Ministrja e Bujqësisë Anila Denaj ishte e ftuar këtë të Enjte në studion e “Milori Live” në Klan News.
Denaj vuri theksin te puna e madhe e një ekipi të tërë, që nga kujdesi ndaj jetës së kafshëve në vend e deri te përgatitja për situata emergjente për bimësinë.
E pyetur se a do jetë më i kënaqur fermeri shqiptar me buxhetin e vënë në dispozicion vitin e ardhshëm, Denaj u përgjigj: Unë mendoj se fermeri shqiptar, sikurse çdo sektor në Shqipëri, do kërkojë gjithnjë e më shumë dhe kjo është për të gjithë sektorët. Nevojat gjithmonë në rritje edhe në raport me skemën nacionale kanë çuar drejt efektivitetit të skemës. Ne kemi pasur përpara një skemë të drejtëpërdrejtë me 1 miliardë lekë dhe mbështesnim 8 mijë fermerë, sot kemi 5.2 miliardë lekë dhe mbështesim 65 mijë fermerë. Gjatë kësaj periudhë është formalizuar shumë ekonomia në raport me niptin e fermerit, por ne duam të shkojmë drejt ndërmarrjeve.
Për projekt-buxhetin e 2024-ës u shpreh mjaft optimiste, duke theksuar se ka një rritje të të ardhurave të përgjithshme e cila pasohet me zero rritje taksash.
Po a do jetë viti që vjen me më shumë para dhe shpenzime ekstra për qytetarët? Sipas ministres, qeveria aktuale ka punuar ndër vite për rritjen e pagave dhe 2024-a do të ketë një rritje ekonomike me mbi 3%.
“Ky vit buxhetor që vjen do ketë ulje të borxhit dhe balancë primare pozitive”, përfundoi Denaj./ Tv Klan
