Ministrja e Arsimit, Besa Shahini ka pranuar dhunën që është ushtruar ndaj një drejtoreshe, në një nga shkollat e Tiranës. Ajo thotë se për këtë rast dhune dhe shumë të tjera të regjistruara ndaj punonjësve të shtetit, qeveria po përgatit ndryshimet në kodin penal.
“Para pak ditësh një prind ka goditur mësuesin e fëmijës së tij. Arsyet nuk janë të rëndësishme sepse nuk ka asnjë arsye që kjo të ndodhë! Për rastet e dhunës si ky apo ato ndaj mjekëve, policëve dhe kujtdo punonjësi tjetër që mundohet t’i shërbejë qytetarëve me punën e tij, kemi nisur paketën e re të ndryshimeve në kodin penal, e cila do të votohet në seancën plenare të radhës. Qëllimi është që dënimi të jetë i përshtatshëm dhe të shërbejë si parandalues i akteve pa sens të dhunës!”, shkruan ministrja. Por vetëm kaq!
Në datën 25 prill ishte ish-kryeministri Sali Berisha ai që denoncoi rastin. Sipas denoncimit, një eksponent i Partisë Socialiste kishte dhunuar drejtoreshën e shkollës në Lundër, aty ku mësonte dhe djali i tij.
Sipas rrëfimit të drejtoreshës së shkollës ai e ka goditur me shuplake. Dhunës nuk i kanë shpëtuar edhe dy mësuese të tjera që janë futur për të qetësuar situtën, ndërsa të gjitha skenat e dhunës janë bërë përpara syve të fëmijëve.
Neni 237 – Goditjet për shkak të detyrës
Goditjet ose vepra të tjera dhune që i bëhen punonjësit që kryen një detyrë shtetërore apo një shërbim publik, për shkak të veprimtarisë së tij shtetërore apo të shërbimit, dënohen me gjobë ose me burgim gjer në tre vjet. / Opinion.al
