Mungesa e propozimit për emërimin e rektorit të Universitetit të Mjekësisë, ka vënë sërish përballë qeverinë dhe institucionin e Presidentit të Republikës.
Prej tre vitesh, ky universitet nuk drejtohet nga një rektor i mirëfilltë, pra i dekretuar nga Presidenti i Republikes. Por, Ministria e Arsimit për të evituar pikërisht rolin e Presidentit të Republikës në këtë proces ashtu siç kushtetuta e sanksionon, ka zgjedhur rrugën e emërimit të një zv-rektori, i cili kryen edhe detyrën e rektorit.
Në një shkresë zyrtare dërguar Kryeministrit Rama, Presidenti i Republikës Nishani shprehet se ka kërkuar informacion nga Ministrja e Arsimit Nikolla, për mënyrën e emërimit të rektorit aktual Arben Gjata.
“Nga Sekretari i Përgjithshëm i Ministrisë së Arsimit, informohem se z. Gjata është në këtë detyrë si zëvendës rektor dhe se e ushtron këtë detyrë në mungesë të rektorit, emërim i cili sipas Kushtetutës bëhet nga Presidenti i Republikës.
Kjo përgjigje nuk zgjidh dhe sqaron këtë situatë të paligjshme, që ka të bëjë me mosrealizimin e zgjedhjeve për rektor, për më shumë se tre vite, ndaj gjykoj që në funksion të bashkëpunimit dhe bashkërendimit të punëve, të ushtroni autoritetin e qeverisë që ju drejtoni për rregullimin dhe mirëfunksionimin, e drejtimit të këtij institucioni të Arsimit të
Lartë duke organizuar procesin e detyrueshëm zgjedhor’’.
Sipas Presidentit të Republikës, ky universitet ka gjetur mbështetjen institucionale maksimale nga institucioni që ai drejton, në dhënien e mundësisë për realizimin e procedurave të zgjedhjeve për rektor, e konkretisht në emërimin e dy rektorëve me mandat një vjeçar secili, por që me përfundimin e mandatit të rektorit të dytë, prej marsit të vitit të shkuar, ky universitet ka mbetur pa përfaqësuesin e tij ligjor.
Tv Klan
