Kryenegociatori i Shqipërisë në BE, Zef Mazi, ministrja e Shtetit për Parlamentin Elisa Spiropali dhe ministrja për Bashkimin Europian dhe Kushtetutën, Karoline Edstadler kanë mbajtur një konferencë të përbashkët për mediat ditën e sotme në Tiranë.
Ministrja për Bashkimin Europian dhe Kushtetutën Edstadler u shpreh se Austria do të mbështesë integrimin e vendeve të Ballkanit Perëndimor, teksa theksoi se Shqipëria duhet që të vazhdojë reformat që ka nisur.
“Është kënaqësi që jam në Shqipëri dhe të shoh vullnetin e vendit për të ecur me reforma, që të hedhe hapa të rëndësishme drejt BE-së. Austria e ka përparësi që të mbështesë procesin e integrimit për Ballkanin Perëndimor. Është e nevojshme që ju të vazhdoni reformat tuaja. Ka shumë për të bërë. Ne do bëjmë maksimumin që të bindim miqtë tanë edhe në BE, që të mos bllokojnë procesin integrues për Shqipërinë.”- tha Karoline Edstadler./Opinion.al
