“Shëndetësia falas” është togfjalëshi që kryeministri Edi Rama përmend kudo. Por siç duket dardha e ka bishtin pas. Por një urdhër i ri të dalë nga Ministria e Shëndetësisë dhe Mbrojtjes Sociale detyron drejtoritë e spitaleve që ndërhyrjet kirurgjikale t’i planifikojnë bazuar në kontratën e lidhur me koncesionarin që furnizon sallat me materialet sterile. Pra e thënë troç, kirurgët duhet të tregohen të kursyer me operacionet që kryejnë, kanë apo jo nevojë pacientët.
Në spitalin e Durrësit për shembull në një muaj duhet të kryhen 155 ndërhyrje kirurgjikale, 65 prej tyre te planifkuara, por nëse numri i operacioneve urgjente rezulton më shumë se 90 shefi i shërbimit duhet t’i shtyjë ndërhyrjen pacientit që e ka planifikuar. Të paktën kështu thuhet në shkresën që drejtoria i ka dërguar shefit të shërbimit të kirurgjisë në spitalin e Durrësit.
Ndërkohë spitali i Fierit nuk duhet të tejkalojë buxhetin prej 46 mijë lekë në vit për shërbimin e sterilizimit. Drejtori i Fondit të Sigurimit të Detyrueshëm të Kujdesit Shëndetësor i kërkon spitalit rajonal të ruajë limitet buxhetore dhe të planifikojë numrin e ndërhyrjeve kirurgjikale në përputhje me kontratën e lidhur me koncesionarin.
Ministria e Shëndetësisë në dhjetor të vitit 2015 i dha me koncension “Sani Service” sterilizimin e pajisjeve kirurgjikale. Kontrata u firmos për një afat 10 vjeçar me një vlerë të parashikuar prej 9.6 miliardë lekësh.
REAGIMI
Ky nuk është urdhër i dalë nga Ministria e Shëndetësisë dhe Mbrojtjes Sociale. Sidoqoftë sikurse ndodh rutine, çdo shërbim qe ka kirurgji planifikon ndërhyrjet sipas prioriteteve, në mënyrë periodike. Domethënë çdo operacion që nuk është për ndërhyrje urgjente bëhet nëpërmjet sistemi të referimit që rekomandohet nga mjeku specialist dhe është ky rekomandim referon nëse behet fjale për urgjence apo jo. Ndërhyrjet kirurgjikale si kudo në bote, edhe tek ne planifikohen kur nuk janë urgjente. Stafi është me eficente kur ndërhyrjet janë të planifikuara dhe po ashtu planifikimi nëpërmjet sistemit të referimit ka kosto të cilat duhen planifikuar paraprakisht nga strukturat përkatëse. Në rastin konkret sipas rekomandimit të mjekut specialist kirurg pacienti ndjek rrugën e sistemit te referimit. /Opinion.al
