Ministria ruse e Mbrojtjes ka thënë se ka dilema për deklaratat e Trump, pasi aty nuk janë dhënë informacione të besueshme rreth operacionit, teksa ka renditur arsyet pse versioni i SHBA-së duket i dyshimtë.
“Numri në rritje i pjesëmarrësve në operacion dhe shtetet që dyshohet se kanë qenë pjesë e ‘operacionit’, secili me detaje kontradiktore, rrit pyetjet dhe dyshimet nëse ka ndodhur dhe sa i suksesshëm ka qenë”, thuhet në deklaratë.
Ministria po ashtu ka ulur rëndësinë e Baghdadit, duke thënë se edhe nëse konfirmohet vdekja e tij, sërish “nuk do të ketë rëndësi operacionale” në situatën në Siri apo në veprimet e militantëve të mbetur në rajonin Idlib të Sirisë.
Ndërkaq, në dallim nga Ministria, zëdhënësi i Kremlinit, Dmitry Peskov tha se presidenti amerikan, Donald Trump ka dhënë një kontribut të madh në luftën kundër terrorizmit ndërkombëtar, nëse është e vërtetë se është vrarë Abu Bakr al-Baghdadi, lideri i grupit militant, Shteti Islamik.
Peskov u tha gazetarëve se ushtria ruse ka vënë re aeroplanët amerikanë dhe dronë në zonën në të cilën Uashingtoni ka thënë se ka kryer operacionin në Siri por nuk ka treguar nëse Shtetet e Bashkuara kanë informuar paraprakisht Rusinë për këtë operacion.
“Nëse informacioni për vrasjen e Baghdatit konfirmohet, ne mund të flasim për kontributin serioz të presidentit të Shteteve të Bashkuara në luftën kundër terrorizmit ndërkombëtar”, ka thënë Peskov./Opinion.al
