Me qindra fëmijë janë paraqitur këto ditë në dyert e urgjencave pediatrike për shkak të temperaturës së lartë, kollës, etj. Vetëm dje në QSUT numëroheshin 400 vizita fëmijësh në urgjencën e Pediatrisë. Edhe pse gripi ka rreth një muaj që qarkullon në vend duke prekur me mijëra qytetarë nuk kemi parë asnjë mesazh sensibilizues dhe orientues nga Ministria e Shëndetësisë dhe ISHP-ja që e kanë për detyrë. Nuk është folur as për vaksinat e gripit apo masa të tjera të higjienës dhe kujdesit sidomos në institucione.
Sot kur dyert e ambulancave dhe urgjencave mbushen plot, Ministria kujtohet të mbyllë shkollat, kopshtet dhe cerdhet, duke e cilësuar situatën alarmante. Po sot Ministria e Shëndetësisë kujtohet për vaksinën, duke thënë se: Ministria e Shëndetësisë dhe ISHP kanë siguruar 93 250 doza vaksinë kundër gripit, të parakualifikuar nga OBSH”. Ndërkohë që vaksinat duhet të ishin shpërndarë në shtator dhe në tetor. Qytetarët duhet të ishin vaksinuar përpara epidemisë së gripit.
Shkollat gjithashtu duhet të ishin njoftuar më herët për pezullimin e mësimit. MSH udhëzon mos-hapjen e shkollave, cerdheve e kopshteve deri më 9 Janar, pra të hënën e ardhshme. Kjo mbetet një situate e vështirë për prindërit të cilët nisin punën dhe nuk kanë ku të lënë fëmijët në datat, 4,5,6,7 Janar./Opinion.al
