Në një deklaratë për mediat, zv/ministri i Infrastrukturës dhe Energjisë bëri me dije se kanë nisur procedurat për ndërprerjen e kontratave me 17 subjekte për ndërtim hidrocentralesh, pas procesit të skanimit të gjithë dokumentacionit të tyre, të filluar disa javë më parë.
“Nga Agjencia Kombëtare e Burimeve Natyrore tashmë ka përfunduar procesi i monitorimit dhe verifikimit të situatës në terren dhe puna është fokusuar në praktikën dokumentare dhe koordinimin e qëndrimeve me institucionet e tjera si Ministrinë e Turizmit dhe Mjedisit dhe Agjencinë e Menaxhimi të Burimeve Ujore për të dalë në konkluzionin dhe hapat që duhet të ndiqen. Nga vijimi i procesit të skanimit ka rezultuar dhe nëntë raste të tjera të shkeljeve të kushteve kontraktuale nga ana e subjekteve për të cilat do fillohet procedura e ndërprerjes në mënyrë të njëanshme të kontratës.
Deri më sot numri i praktikave për të cilat ka filluar procesi i ndërprerjes në mënyrë të njëanshme i kontratave koncesionare shkon në 17. Sikurse është theksuar dhe më parë, nga ana e Ministrisë së Infrastrukturës dhe Energjisë po procedohet me kujdes për të minimizuar risqet e mundshme dhe implikimet financiare për buxhetin e shtetit. Problematikat e përsëritura gjatë këtij procesi skanimi, analizohen në funksion të riinxhinierimit të gjithë procedurës për lidhjen e kontratës koncesionare sikundër dhe për procesin e monitorimit dhe kontrollit të kësaj të fundit”, tha ai./Opinion.al
