Kombëtarja shqiptare nuk ka marrë ende premion prej 1 milion eurosh të vendosur nga qeveria pas fitores historike në Europian kundër Rumanisë.
Burime të “Panorama Sport” në FSHF treguan dje se Ministria e Financave nuk ka ekzekutuar ende vendimin e marrë nga Këshilli i Ministrave që më 20 qershor.
Në këtë datë u miratua dhënia e një fondi shtesë prej 1 milion eurosh si shpërblim Kombëtares.
Qeveria bënte të ditur se ky fond do të transferohej në llogarinë e Federatës Shqiptare të Futbollit, që do të bëjë edhe shpërndarjen e premios te lojtarët dhe pjesëtarët e stafit teknik.
Në vendimin e marrë, urdhëroheshin Ministria e Arsimit dhe Sportit, si dhe Ministria e Financave, që ta zbatonin sa më shpejt.
Mirëpo, deri më tani, mësohet se në llogarinë e FSHFsë nuk ka kaluar shuma prej 1 milion eurosh.
I vetmi premtim i mbajtur nga dy të tillë pas fitores historike ishte ai i pajisjes së lojtarëve me pasaporta diplomatike. Tashmë kuqezinjtë presin të shpërblehen, nisur edhe nga konfirmimi i vet kryeministrit Edi Rama.
Kreu i qeverisë, pak minuta pas përfundimit të ndeshjes ndaj Rumanisë, ka telefonuar presidentin e FSHFsë, Armand Duka, duke i bërë të ditur se për këtë sukses ekipi do të shpërblehet me 1 milion euro.
Madje, mes batutave, Rama i premtoi makinë Ergys Kaçes dhe traktor Mërgim Mavrajt, por nuk munguan thirrjet e lojtarëve për premion: “Kur do t’i kaloni 1 milion eurot?”.
Ndërkohë, vlen të theksohet se në total shkoi 3 milionë euro shpërblimi për kuqezinjtë pas tri pikëve historike në Europian.
Dy milionë euro premio i akordoi institucioni i futbollit shqiptar. Pas Europianit nuk u shpërblyen vetëm lojtarët dhe pjesëtarët e stafit teknik, por edhe administrata e FSHFsë pas një vendimi qarkullues të KEsë.
Zyrtarë të federatës që ishin në Francë kanë marrë nga 5 milionë lekë të vjetër secili, ndërsa ata që qëndruan në Tiranë gjatë Europianit nga 1 milion lekë të vjetër.
Çuditërisht nuk përfituan shpërblim vetëm trajnerët e Kombëtareve të moshave: Redi Jupi (U21), Arian Bellaj (U19) dhe Xhemal Mustedanagiç (U17).
Panorama Sport
