Ministrja e Drejtësisë, Etilda Gjonaj ka kërkuar sot nga KLD të marrë masa për kryetarin e Gjykatës së Shkodrës, Arben Zefi. Sipas ministres, Zefi ka fshehur një dënim të kancelarit të gjykatës. Gjonaj kërkon që KLD të hetojë këtë rast dhe të nisë masat displinore ndaj kryegjyqtarit. Ky është rasti i tretë brenda pak ditësh që ministrja i kërkon Këshillit të Lartë të Drejtësisë të shkarkojë gjyqtarët.
Javën e kaluar Gjonaj i kërkoi KLD të shkarkojë gjyqtarin Petraq Curri të Gjykatës së Rrethit Gjyqësor Durrës si dhe fillimin e hetimit disiplinor ndaj gjyqtares Enkeleida Hoxha të Gjykatës së Rrethit Gjyqësor Krujë.
Lidhur me rastin e kryetarit të Gjykatës së Shkodrës, Ministria e Drejtësisë thotë:
Nga hetimi ka rezultuar se Gjykata e Rrethit Gjyqësor Shkodër, nuk ka përcjellë pranë Drejtorisë së Përgjithshme të Burgjeve shkurtimin e vendimit penal të formës së prerë për dënimin e shtetasit A.D., aktualisht kancelar i Gjykatës së Rrethit Gjyqësor Shkodër, për veprën penale të parashikuar nga neni 290/1 i K.Penal. Në Regjistrin e Gjendjes Gjyqësore, ky shtetas rezulton në mënyrë të paligjshme si i padënuar nga gjykatat penale shqiptare.
