Ministri i Financave, Petrit Malaj ishte i pranishëm sot në Konferencën e Nivelit të Lartë të Drejtorëve të Përgjithshëm të Doganave të Ballkanit Perëndimor dhe shteteve anëtare të BE-së.
Gjatë fjalës së tij në këtë event, Malaj u shpreh se Shqipëria dhe vendet e Ballkanit Perëndimor kanë një objektiv dhe ambicie të përbashkët, që është integrimi në BE.
“Pjesëmarrja në këtë konferencë pasqyron vizionin tonë të përbashkët për një të ardhme në themel të së cilës është partneriteti i fortë dhe përpjekja e vazhdueshme për një integrim sa më të shpejtë të Ballkanit Perëndimor në BE. Vetëm duke punuar bashkë dhe duke bashkuar forcat mund të arrijmë rezultate konkrete duke siguruar një konkurencë të ndershme në tregun evropian dhe më gjerë. Shqipëria si vendet e tjera të BP kanë një ambicie të përbashkët dhe synim të qartë që është integrimi në BE.
Për të arritur me sukses drejt këtij objektivi sipërmarrjet tona duhet të jenë të gatshme të japin kontributin e tyre për një ekonomi të fortë të përbashkët. Duam të shohim që ndërmarrjet tona të jenë konkurruese në këtë treg dhe të tërheqin investime të huaja dhe të shtrihen në tregje të reja. Kjo kërkon angazhim të vazhdueshëm dhe të shtuar. Sipërmarrja do të jetë partneri ynë kryesor dhe për këtë po ndërmarrim reforma”, thotë Malaj
Ndër të tjera Malaj shprehet se prioritet mbetet avancimi i korridoreve të gjelbra dhe të kaltra mes Ballkanit Perëndimor dhe BE.
“Prioritetet tona përfshijnë forcimin dhe përafrimin e standardeve me proceset doganore të Bashkimit Europian, rritjen e bashkëpunimit rajonal mes administratave doganore të Ballkanit Perëndimor, mbështetjen dhe lehtësimin e tregtisë dhe integrimin ekonomik më të thelluar përmes koordinimit ndërinstitucional dhe partneriteteve të forta mes doganës dhe biznesit, sikundër edhe ndër prioritetet tona është avancimi i korridoreve të gjelbra dhe të kaltër ndërmjet Ballkanit Perëndimor dhe BE për të mundësuar kalime më të shpejta dhe më të integruara në kufi. Ne do të vijiojmë me investimet për kapacitetet dhe asistencës teknike dhe sikundër po prmovojmë marrjen e statusit të operatorëve ekonomik të autorizuar”, thekson Malaj.
