Ministri i Brendshëm Sandër Lleshaj është takuar pasditen e sotme me strukturat e policisë së qarkut të Beratit. Takimi me dyer të mbyllura ka zgjatur rreth 3-orë dhe është fokusuar tek guroret që kanë ushtruar prej 20-vjetësh aktivitetin në qarkun e Beratit.
Lleshaj u ka kërkuar efektivëve të policisë së Beratit të fokusohen në kontrollet në Guroret e Urës-Vajgurore, duke mos lejuar funksionimin e tyre; në kontrollet në guroret informale në Malin e Tomorrit dhe në kontrollet përgjatë gjithë bregut të lumit Osum, për të mos lejuar askënd që të shkarkojë mbetje e të hedhë plehra në ujërat e tij.
Burimet konfirmojnë se Lleshaj ka kërkuar të luftohet me forcë dhe pa asnjë tolerancë krimi, në të gjitha format e tij. Përveç urdhëresave të dhëna, mësohet se ministri nuk i ka kursyer as falënderimet për punën e mirë të bëra nga strukturat e policisë së qarkut Berat, qark që shënon ulje në rritje nga viti në vit të veprave kriminale.
