Shifrat e së shtunës duket se e kanë zbehur disi entuziasmin e Italisë lidhur me ecurinë e COVID -19. Numri i vdekjeve shënoi rritje në raport me dje, e po kështu edhe të prekur në zonën e Lombardisë u dyfishuan.
Të paktën deri në 3 maj Italia do të vazhdojë të jetë e mbyllur, si pasojë e masave shtrënguese për të ndërprerë zinxhirin e transmetimit të sëmundjes.
Në një dalje për mediat Ministri i Shëndetësisë, Roberto Speranza, është shprehur se normaliteti do të rikthehet vetëm në momentin kur do të ketë një vaksinë kundër Covid-19.
“Ne po punojmë për të rikthyer sa më parë kompanitë dhe njerëzit në normalitet. Për momentin, distancimi social është e vetmja armë që kemi dhe deri në daljen e vaksinës na mbetet të presim, për t’u rikthyer më pas jetës normale”, ka thanë ministri italian i Shëndetësisë.
Në anën tjetër, Ministria e Brendshme italiane paralajmëroi se ekziston rreziku i tensioneve serioze për shkak të vështirësive të biznesit dhe mbylljes së vendeve të punës./Opinion.al
