Presidenti amerikan, Donald Trump deklaroi se është “shumë herët” për ta takuar ministrin e Jashtëm iranian, Mohammad Javad Zarif, i cili ka bërë një vizitë të papritur gjatë fundjavës në Samitin e shtatë vendeve më të industrializuara (G7).
“Mendoj se është shumë herët për t’u takuar me të”, ka thënë Trump. Ndërkaq presidenti ka shtuar se është në kërkim të një Irani të mirë, të fuqishëm, dhe nuk po kërkon ndryshim të regjimit.
“Unë jam në kërkim të një Irani të mirë, të fuqishëm, dhe nuk po kërkojmë ndryshim të regjimit. E keni parë si ka funksionuar në 20 vjetët e fundit, nuk ka qenë aq mirë. Irani ka mundësi për të ndërtuar veten dhe të kthehet në komb fantastik. Ata duhet t’i japin fund terrorizmit”, ka thënë Trump, teksa liderët e Japonisë, Gjermanisë, Francës, Italisë, Britanisë dhe Kanadasë, janë mbledhur në juperëndim të Francës.
Samiti treditor në Biarritz është përballur me një ndryshim drastik të vëmendjes kur Zarif ka bërë një vizitë të papritur bashkë me ekipin e tij./Opinion.al
