Ministri i Jashtëm i Rusisë, Sergey Lavrov, pretendon se mercenarë nga Shqipëria, Kosova dhe Bosnje-Hercegovina janë dërguar në Donbas, krahinën e Ukrainës të ndarë mes qeverisë së Kievit dhe separatistëve të mbështetur nga Moska.
Në fillim të këtij muaji, inteligjenca e milicisë Donbass raportoi për praninë e mercenarëve britanikë dhe polakë që vepronin në afërsi të vijës së frontit në Ukrainën lindore.
Ndërkohë media ruse “Sputnik”, citon Lavrov, ministrin e Jashtëm rus dhe shkruan se Rusia po rishikon informacionet që sugjerojnë se nga Republika Kosovës, si dhe nga Shqipëria dhe Bosnja janë duke u rekrutuar mercenarë për t’u vendosur në Donbas.
“Kosova dhe disa pjesë të tjera të Ballkanit Perëndimor po bëhen një terren pjellor për krim. Ka terroristë, tregtarë droge. Është një terren rekrutimi për mercenarët që marrin pjesë në konflikte të cilat po nxiten gradualisht. Ka informacione se mercenarët po rekrutohen në Kosovë, Shqipëri, Bosnje dhe Hercegovinë dhe po dërgohen në Donbass, ndër të tjera, për të nxjerrë jashtë ekuilibrit Rusinë. Ne po e rishikojmë këtë informacion tani”, tha ministri i Jashtëm rus./Opinion.al
