Ministri i Jashtëm gjerman, Heiko Mass është shprehur në favor të çeljes së negociatave për anëtqarësim me Shqipërinë dhe Maqedoninë e Veriut në tetor. Në një konferencë të përbashkët me homologun kroat, Mass vlerësoi progresin e bërë nga të dy vendet dhe tha se për çeljen e negociatave po diskutohet jo vetëm në qeverinë gjermane por edhe në Budestag.
“Mendoj se Bashkimi Europian, si një projekt paqeje dhe promotori ekonomik, nuk është askund tjetër më i rëndësishëm se në Ballkanin Perëndimor. Maqedonia e Veriut dhe Shqipëria kanë bërë progres real dhe unë nuk kam çfarë të them tjetër. Duhet t’iu ofrojmë këtyre dy vendeve një perspektivë te besueshme europiane dhe duhet të nisim bisedimet për anëtarësim. Kjo është diçka të cilën ne nuk po e diskutojmë vetëm në qeverinë gjermane, por edhe në Bundestag ku duhet të merret një vendim” u shpreh kryediplomati gjerman.
Gjermania dhe Kroacia do të kenë Presidencën e radhës të Bashkimit Europian gjatë vitit 2020. Heiko Mass dhe ministri i Jashtëm kroat Gordan Grlić Radman kanë mbështetur hapjen e negociatave për anëtarësim me Shqipërinë dhe Maqedoninë e Veriut. Qasja positive e kryediplomatit gjerman është shprehur në disa raste por qeveria gjermane është përçarë lidhur me këtë çështje. Kancelarja Merkel dhe liderët e disa vendeve të tjera të Europës kryesisht veriore, sugjeruan që vendimi të shtyhej në tetor. /Opinion.al
