Elvis Roshi u shkarkua nga detyra si bashkiak i parë i Kavajës në fundin e dhjetorit të vitit që lamë pas, pasi Komisioni Zgjedhor i hoqi mandatin në kushtet kur mandati i tij prekej nga ligji për dekriminalizimin. Shkarkimi u firmos nga vetë Kryeministri Rama, pas një rezistence të fortë për të mbrojtur Elvisin me disa emra, që kishte fshehur disa vepra penale të kryera në Itali dhe gjetkë. Por kur të gjithë prisnin tashmë vendimin e Gjykatës Kushtetuese, aty ku Roshi ka ankimuar vendimin e Komisionit Zgjedhor, Elvisi na është shfaqur buzagaz në Kavajë me statusin e kryebashkiakut në krah të Ministrit të Financave Arben Ahmetaj, në një mbledhje të Partisë Socialiste. Në një video virale e cila po bën xhiron e rrjeteve sociale. Një video ku Ahmetaj pasi i thur ditirambe Elvisit ndërsa quan atë kryetarin e bashkisë më të suksesshëm në Shqipëri, nuk ngrurron herë pas herë ti drejtohet me fjalët “Kryetari”.
Ahmetaj po kështu ndërsa e “kongratulon” Kryetarin, thotë se falë po këtij Kryetari pra Elvisit Kavaja është kthyer në një qytet bregdetar i cili thith 40 përqind të turizmit vendas dhe gati sa nuk i fërkon shpatullat për këtë arritje duke i thënë “Bravo”. Madje, madje Ahmetaj thotë se e kishte shumë të vështirë të vinte në Kavajë si deputet i ardhshëm pasi i kishin thënë që Kryetari pra Elvisi ishte nga ata që kërkonte vetëm projekte, projekte dhe vetëm projekte.
Në fakt pa anashkaluar edhe estradën e arritjeve dhe sukseseve ekonomike që sjellin premtimet elektorale, Z. Rama dhe jo thjesht Z. Ahmetaj, duhet të dalë dhe tu shpjegojë shqiptarëve përse e shkarkoi Elvisin me disa emra, kur kryetari i Bashkisë së Kavajës për ministrat e tij është akoma në detyrë si Kryetari i Bashkisë së Kavajës? A i përmbahet Kryeministri ligjit për Dekriminalizimin dhe kur firmosi shkarkimin e Roshit a ishte i bindur se Elvisi kishte shkelur normativat e këtij ligji?
Z. Kryeministër fakti që ministrat e tu dalin dhe bëjnë fushatë me individë të prekur nga ligji i dekriminalizimit, a po i jep një kauzë opozitës se zgjedhjet e ardhshme po tentohen të blihen nga krimi? Dhe e fundit z. Kryeministër, duke qenë se flisni shpesh për Reformën në Drejtësi dhe e keni veshur si kauzën tuaj më madhorë në këtë mandat qeverisës, çfarë mesazhi po i dërgoni Gjykatës Kushtetuese për Elvis Roshin, kur ka ende një vendim që pritet të merret për mandatin e tij?
