Ministria e Drejtësisë, ka bërë gati draftin për projektligjin për amnistinë penale.
Ministri Ulsi Manja, në një postim në rrjetin social “Facebook”, është shfaqur këtë të enjte duke mbajtur draftin e amnistisë në dorë.
Para se ky draft të marri formën e plotë të projektligjit do të merren së pari edhe rekomandime të tjera nga institucione të ndryshme, të cilat do të vlerësojnë nëse ky draft plotëson të gjitha kriteret ligjore.
Kujtojmë se amnistia në institucionet e vuajtjes së dënimit ishte një premtim që u bë para zgjedhjeve të pranverës, por u ndërpre pikërisht prej proceseve elektorale në mënyrë që të mos kishte ndikim, sipas asaj që ka deklaruar qeveria.
Krahas fotos, Manja shkruan: “premtimet nuk harrohen”.
Në projektligj parashikohen edhe kategoritë e personave që përfitojnë nga kjo amnisti.
“Qëllimi i këtij ligji është të përjashtojë nga vuajtja e dënimit dhe ndjekja penale tërësisht ose pjesërisht, të gjithë personat që plotësojnë kriteret.
Dhënia e amnistisë, sipas këtij ligji, udhëhiqet nga parimi i humanizmit, arritja e qëllimit të dënimit, rrezikshmëria e ulët e personave që amnistohen, edukimi dhe rehabilitimi si dhe mbrojtja e interesit publik”, thuhet nder te tjera ne projektligj.
