Ministri për Evropën dhe Punët e Jashtme, Igli Hasani, ka zhvilluar sot në mjediset e MEPJ një bashkëbisedim pune me Konsujt e Nderit të akredituar në vendin tonë.
Në fokus të këtij takimi ka qenë rëndësia e angazhimit konsullor në diplomacinë ekonomike, si dhe forcimi i mekanizmave mes MEPJ dhe Konsujve të Nderit për të shkëmbyer ide dhe për të ndërtuar partneritete praktike që sjellin ndikim afatgjatë në forcimin e urave mes Shqipërisë dhe vendeve që përfaqësojnë.
“Konsolidojmë mekanizmat për një bashkëpunim afatgjatë, të strukturuar dhe të qëndrueshëm me Konsujt e Nderit në vendin tonë.
Ata janë partnerë të besueshëm për krijimin e lidhjeve më të forta mes Shqipërisë dhe vendeve që përfaqësojnë, prandaj edhe puna e MEPJ në diplomacinë ekonomike nuk do të ishte e plotë pa angazhimin e tyre. Në këtë drejtim, jemi të vendosur të ndërtojmë qasje më proaktive dhe të angazhohemi ngushtësisht për të punuar në fusha me ndikim të prekshëm ekonomik dhe kulturor.
Gjatë bashkëbisedimit të sotëm me Konsujt e Nderit në Shqipëri, nënvizuam bashkërisht rëndësinë për thellimin e bashkëpunimit për të gjeneruar ide që nxisin investimet dhe ekonominë; rolin gjithëpërfshirës në forcimin e imazhit turistik të Shqipërisë; si dhe mbështetjen për eksportimin e produkteve shqiptare jashtë vendit”, shkruan Hasani në rrjetin social Facebook.
