Situata e zjarreve në vend vazhdon të jetë alarmante. Ministri i Brendshëm Dritan Demiraj dhe Ministrja e Mbrojtjes Mimi Kodhelin kanë shprehur shqetësimin për zjarret të cilët prej ditësh kanë mbërthyer vendin.
Demiraj dhe Kodheli thonë se zjarrvënia është e qëllimshme dhe kjo konsiderohet si e paprecedentë dhe se rrezikon sigurinë kombëtare.
Ministri Demiraj në një postim në rrjetet sociale shprehet se përgjegjësit do të kapen dhe do dënohen ashpër, ndërsa inkurajon të gjitha autoritetet që po merren me shuarjen e zjarreve që të shpëtojnë njerëzit dhe pasurinë kombëtare.
Ndërsa ministrja e Mbrojtjes Mimi Kodheli thotë se kjo është situatë thuajse e paprecedentë nga veriu në jug për shkak të zjarreve. “Por më të tmerrshëm e bën fakti që janë të qëllimshëm”, shkruan Kodheli në FB, duke theksuar se FA janë në gatishmëri.
