Pas Gazmend Bardhit dhe Helga Vukajt është radha e Arben Beqirit për të marrë masë administrative ndaj drejtorëve të administratës që përfshihen në fushatën elektorale.
Kështu sot mësojnë se është larguar nga puna drejtoresha e qendrës shëndetësore nr.1 në Lushnje Julinda Feracaku e cila u filmua duke marrë pjesë në fushatën e Ramës në Fier dy ditë më parë. Emisioni investigativ “Boom” në ora News denoncoi se si është kyçur qendra shëndetësore dhe të gjithë punonjësit janë në mitingun e Ramës.
Orari zyrtar i punës në këtë qendër shëndetësore është deri në orën 20:00 të mbrëmjes, por në orën 18:00 aty nuk kishte asnjë punonjës, raporton Ora News.
Ndërkohë, kryeministri Edi Rama ka nxjerrë një urdhër sipas të cilit ndalohen burimet njerëzore të administratës publike të çdo niveli të marrin pjesë në fushatën zgjedhore të qershorit.
Por nga një kërkim të bërë në rrjetet sociale, rezulton se disa prej titullarëve të institucioneve kanë postuar disa nga aktivitetet elektorale, një pjesë e të cilave janë zhvilluar në orarin zyrtar të punës.
