Nga Shkupi, kryeministri Edi Rama iu përgjigj zërave kritikë lidhur me krijimin e minishengenit.
Rama tha në Forumi Ekonomik për Bashkëpunimin Rajonal, se ky projekt nuk është ndërtuar në bodrumet e ish-Jugosllavisë, dhe sipas tij, ai që ka këtë mendim nuk punon për mirëqenien e njerëzve.
Kryeministri iu bëri thirrje dhe shteteve të tjera të Ballkanit Perëndimor që të bëhen pjesë e minishengenit.
“Kjo nuk është një nismë ekskluzive e Shqipërisë, Serbisë dhe Maqedonisë së Veriut, por është një nismë e hapur për të gjithë. Cilido është i mirëpritur të na bashkohet, por ne nuk mund të presim konsensus për t’u takuar. Çohet njëri e thotë unë vë veton dhe ju nuk mund të nënshkruani këtë apo atë. Ne nuk kemi luksin të humbasim kohë, pasi kemi humbur shekuj. Ne nuk mund ta bëjmë si ata dy ballkanasit që luftuan për sulltanin. Kush thotë se është një nismë e projektuar në bodrumet e ish-Jugosllavisë, se Serbia do të na marrë gjithçka kemi, e para jeton në një botë paralele, e dyta jeton për politik në lëkurën e njerëzve dhe jo për rritjen e mirëqenies dhe forcimin e urave mes njerëzve. E treta, harron se po të nisemi kështu edhe BE-ja është një Jugosllavi e madhe. Nëse kjo është e vërtetë, kjo është një Jugosllavi e vogël. Kjo nuk është e vërtetë, pasi është një hapësirë që jeton me vlerat e BE”,- tha Rama./ Opinion.al
