Policia e Librazhdit ka nisur procedimin penal për administratorin e minierës, në të cilën humbi jetën një 57-vjeçar ditën e djeshme.
Uniformat blu bëjnë me dije se administratori së bashku me drejtuesin teknik dhe përgjegjësin e turnit akuzohen për veprën penale “Shkelja e rregullave të mbrojtjes në punë”.
“Librazhd/Në vijim të njoftimit të dhënë ditën e djeshme, për ngjarjen e ndodhur, në fshatin Katjel, ku gjatë punës në minierën e kromit ka rrëshqitur një masiv minerali, dhe për pasojë ka humbur jetën shtetasi S. B., 57 vjeç, grupi hetimor në drejtimin e Prokurorisë ka vijuar veprimet hetimore për zbardhjen e rrethanave dhe dokumentimin ligjor të ngjarjes.
Në vijim të veprimeve, Specialistët për Hetimin e Krimeve të Komisariatit të Policisë Librazhd referuan materialet në Prokurori ku nisi procedimi penal për veprën penale “Shkelja e rregullave të mbrojtjes në punë”, për administratorin e minierës, shtetasin G. B., 56 vjeç, drejtuesin teknik shtetasin H. K., 62 vjeç dhe përgjegjësin e turnit shtetasin G. K., 62 vjeç”, njofton policia.
Materialet iu referuan Prokurorisë për veprime të mëtejshme procedurale.
